1
酒店自助餐或放題餐廳食唔少 Cafe放題就真係未試過
正好想同好耐冇見嘅朋友慢慢傾計吹水💬
於是就去中環嘅Sogno Cafe+ 食餐飽啦🤤
Sogno Cafe+推出咗「任座任飲任食」放題 ($188；另加一)
無限供應食物同飲品各十款
下午時段仲可以坐足5個半鐘🕔
絕對係消磨時間嘅好選擇😍
今次我經網上平台付費 仲有9折優惠添～
鋪內空間唔算大 枱與枱之間有少少迫
不過環境相當雅致 以木色為主調
近門口嘅梳化卡位就最坐得舒服
而我哋就揀咗坐靠窗🌅嘅二人枱
Cafe以本地卡通人物Fluffy House為主題
四處都可見Fluffy House人物嘅大小擺設 以及各種周邊 儼如一個展覽廳✨
1
每個月嘅任食menu都有少少唔同✨
我哋就試咗以下呢啲～
Sogno全日早餐
有最近大熱嘅croffle🥐 加上炒滑蛋同菇菌類等配料
食落都飽肚
🍜黑松露鴨胸野菌扁意粉
黑松露味道濃郁 食完會想再食🤣
🍝溫泉蛋素肉醬鮮茄扁意粉
肉醬份量偏少 而可能係素嘅關係 味道頗淡
🥪他他醬蝦多士
多士炸得香脆 配上他他醬就更好食
🫔吞拿魚碎蛋千層酥
食落鬆脆可口 加入碎蛋亦令口感提升
🥗田園麻醬沙津
沙津加埋藜麥同蜜桃粒 好清新
🥧鹹蛋黃手作Scone
比平時食開嘅scone的骰好多 食落有啲似餅乾
🍰伯爵茶戚風蛋糕
蛋糕好鬆軟 有茶味之餘亦唔會好甜
🍦麻薯窩夫配雪糕
窩夫好香脆 入面仲有煙韌麻薯 朋友就唔太buy呢個配搭 但我就覺得可以一試
飲品方面 有各款咖啡、沙冰、茶可供選擇
值得一提嘅係 餐廳提供半杯份量🥛
等大家可以試多幾款 非常貼心
飲品當中以牛油果🥑芝士奶蓋沙冰最有驚喜
而Latte都幾好飲☕
