歡喜燒 (Closed)

平時去餐廳食串燒，起碼都要十幾蚊串，所以都唔敢叫得多，今次俾我發現左呢間嘢就正啦！係任食串燒呀！仲係有埋個爐俾你即燒即食！呢度有成十幾款串燒任取，全部串好哂相當方便！豬牛雞羊樣樣齊，仲有多款蔬菜類、丸、腸等任揀，質素黎講都算唔錯！串燒唔係用竹籤，而係用金屬枝串起，可以循環再用，唔怕唔環保。而且自助形式，食幾多拎幾多，唔貪心嘅話就唔會造成浪費啦！另外餐廳仲有前菜、小食、炸物、甜品、飯面和飲品都係無限任叫任取，所以一定要捧住個肚走人。我自己就最鍾意雞翼串、台灣腸、泰式雞、澳洲牛，仲有估佢唔到既棉花糖！不過要小心睇住唔好燒過龍，我哋第一串棉花糖就係掛住食忘記咗佢，結果燒融左跌咗落去😆😆提議燒棉花糖時就較細個爐去40就可以！另外剔紙仔裡面既蝦春卷同迷你軟殼蟹漢堡都係唔錯嘅選擇！女人又愛又恨嘅甜品方面，凍櫃內大約都係小蛋糕和慕絲幾款選擇另外可以揀台式刨冰，有牛奶、芋泥、仙草底再加配料，今日就試左牛奶底加蘆薈肉、優格魔豆、水晶愛玉凍和芋頭圓，我幾鍾意優格魔豆同埋水晶愛玉，牛奶底嘅味道都唔錯，好彩佢細細碗，少食多滋味，不過最後我都係飽到雪糕都食唔落，太可惜啦！