鍋卷鳴門 (Closed)

火鍋放題食得多，不過可以無限次喺水缸夾活海鮮嘅就真係第一次，真係海鮮迷福音呀。放題套餐分「下忍」、「中忍」且同「上忍」，三者嘅分別係時限同牛肉種類。入座時先揀湯底，我哋揀咗鰹魚清湯同蕃茄羅宋湯，鰹魚清湯唔會遮蓋海鮮味道，而蕃茄羅宋湯就開胃，爭強戰力。第一時間出去自助區先，個水缸都好大吓，而且水質乾凈清澈，食得放心。是日海鮮有草蝦、藍花蟹、沙白、瀨尿蝦、大連鮑魚，全部都係鮮活嘅，夾起放入冰桶凍暈佢就可以拎返枱打邊爐。以為任食質素會一般就大錯特錯。草蝦都比一般蝦大隻，超生猛遊得好快好難捉；瀨尿蝦全部都好大隻，蝦殼好易就剪開而且肉唔係黐殼，啖啖肉真係超滿足；大連鮑魚有掌心咁大隻，口感爽彈；藍花蟹嘅蟹肉雪白鮮甜。除咗海鮮，自助區亦有其他火鍋配料，亦都可以掃QR code手機落單，有火鍋牛肉、天婦羅料理、刺身等等。餐廳雖然以海鮮做賣點但其他食品質素都不錯，牛肉鮮嫩味道濃郁，天婦羅係即炸，刺身厚切肥美，仲有熟食醬油蝦都幾惹味㗎。我哋兩個人分工合作，一個負責攞海鮮，一個負責淥，都食咗好多海鮮，回本有凸，超級滿足，海鮮迷一定唔可以錯過！