南越牛肉粉 (Closed)

今日同同事決定去試吓呢間新開嘅越南餐廳，一行5人喺1:10已經到達，啱啱好仲有一張近廚房出菜位嘅6人枱，相信食晏時候嚟食行慢半步都冇位。一坐低餐紙上項目都算多，但係冇午餐之類，都冇緊要啦，當我哋想落單時，待應就溫馨提示有午餐同即時攞咗個午餐牌俾我哋。其實午餐會平幾蚊同包一杯熱飲。講講今日食咗啲咩先:-香茅牛肉撈檬 - $41香茅雞翼湯河- $43香茅豬扒飯 - $43雞絲扎肉湯檬 - $43而我就食香茅豬扒湯檬 - $43一眼望落去份量絕不騙場，唔係只有個碗大，湯粉都幾多吓。個湯底好好味，而且色水都好清，加咗一啲切得纖細嘅洋蔥圈、必定有嘅芽菜、炸蔥粒同金不換等。而個香茅豬扒好大塊同好厚吓，食落鬆鬆軟軟，略嫌香茅味唔夠重。我仲食咗同事隻香茅雞翼，唔太大隻，都幾入味不過都係香茅味唔夠重。其他食物同事們都係讚，而且仲話會再幫襯，因為感覺好越南味，仲有份量夠大抵食咁話。小插曲: 雞絲扎肉湯檬嚟嘅時候竟然冇雞絲，通知咗待應姐姐之後，佢好快就攞番一碗俾我哋，而且呢位待應姐姐見我哋影相仲主動幫我哋擺好啲位，真係幾貼心。