Video
Read full review
2016-12-12
1954 views
今日媽媽生日，而我知道佢想食日本菜好耐，於是今日帶左佢去中港城上面一間食高級日本料理名叫「福村」，上左長電梯去到Tower3便會見到福村了。好彩一早有Book定位，入到店家已經見到全場滿座，由於去之前我地都諗定要點Omakase(廚師發板)，所以安排我地坐刺身壽司BAR其實仲好，師傅每上一道菜都會同我地悉心解釋唔同既食材同埋最佳既食用方法，而且可以全程睇住師傅炮製唔同既料理特別好FEEL。如果係有一大班朋友既聚會，可以預先打定去店家預約房間。第一道菜：日本波菜沙律 – 相當唔錯，生波菜完全無苦澀味，再加上有洋蔥令到口感層次更加豐富，配上麻醬汁令人更加開胃。第二道菜：三式前菜 – 酸髮菜+ parma ham+蕃薯 - 髮菜幾爽口帶點微酸，由於加左薑汁所以幾醒胃。Parma ham油脂分佈平均，帶點微微鹹香，我個人覺得鹹道岩岩好。日本蕃薯既外表微微炸過非常香口，食落唔會太粉反而幾清新。第三道菜：各式刺身 – 鰤魚刺身一D筋都無，魚香味濃；醬油醃吞拿魚背帶點微微黃豆醬油味，魚脂分佈平均；拖羅非常肥美，只能夠以入口即溶來形容拖羅既口感；北寄貝刺身入口極爽，新鮮既程度猶如至身於日本築地市場食到
今日媽媽生日，而我知道佢想食日本菜好耐，於是今日帶左佢去中港城上面一間食高級日本料理名叫「福村」，上左長電梯去到Tower3便會見到福村了。好彩一早有Book定位，入到店家已經見到全場滿座，由於去之前我地都諗定要點Omakase(廚師發板)，所以安排我地坐刺身壽司BAR其實仲好，師傅每上一道菜都會同我地悉心解釋唔同既食材同埋最佳既食用方法，而且可以全程睇住師傅炮製唔同既料理特別好FEEL。如果係有一大班朋友既聚會，可以預先打定去店家預約房間。
第一道菜：日本波菜沙律 – 相當唔錯，生波菜完全無苦澀味，再加上有洋蔥令到口感層次更加豐富，配上麻醬汁令人更加開胃。
第二道菜：三式前菜 – 酸髮菜+ parma ham+蕃薯 - 髮菜幾爽口帶點微酸，由於加左薑汁所以幾醒胃。Parma ham油脂分佈平均，帶點微微鹹香，我個人覺得鹹道岩岩好。日本蕃薯既外表微微炸過非常香口，食落唔會太粉反而幾清新。
第三道菜：各式刺身 – 鰤魚刺身一D筋都無，魚香味濃；醬油醃吞拿魚背帶點微微黃豆醬油味，魚脂分佈平均；拖羅非常肥美，只能夠以入口即溶來形容拖羅既口感；北寄貝刺身入口極爽，新鮮既程度猶如至身於日本築地市場食到既最新鮮刺身；最後就係牧丹蝦啦，當然一樣甘新鮮，而且食到每一口都係啖啖蝦肉。食晒刺身後，經理特意過來問我地蝦頭想點食，可以炸或者煮湯，我地都幾鐘意食香口野，所以最後都係簡左炸。
第四道菜：磯煮鮑魚 – 鮑魚煮得非常之甘入味，而且食落一D都唔齦，連平時腸胃麻麻既媽媽都表示食完消化良好，證明師傅將火候控制得剛剛好；另外一定要讚下鮑魚個磯煮汁，夠濃郁而且同鮑魚非常之夾。
第五道菜：（左圖）鐵板金目鯛 – 雖然鐵板既料理未能係我地面前即場做，但呢味鐵板金目鯛上到菜既時候非常熱辣辣，魚既口感一流，配上秘制醬汁鐵板炒非常香口惹味。再配上新鮮既日本南瓜、大磨菇同露筍令到口感更豐富。
第六道菜：（右圖）
燒龍蝦 – 師傅好細心地已經幫我地預先拆定殼，龍蝦肉身爽口彈牙，食落又不失鮮味而且仲好香口添，醬汁師傅話比我地聽係忌廉龍蝦汁，其實最主要係採用龍蝦頭D蝦膏同精華，呢個醬汁同美味既龍蝦肉都係缺一不可。
第七道菜：炆牛脷 – 牛脷係用左磯煮鮑魚個醬汁再用慢火去炆，牛脷炆得非常入味，每一口都會食到有磯煮鮑魚既精華；牛脷煮既火候控制得剛剛好，入口非常淋。
各式壽司：
首先係白蝦北海道海膽三文魚子壽司，白蝦既味道非常濃郁，配上新鮮直送既北海道海膽比到一個更豐富既口感層次，加埋三文魚子更能吊出海膽同白蝦既鮮味，我個人覺得完全唔駛加調味都可以。第二幅圖既係牧丹蝦壽司，賣相可能有D似白蝦海膽壽司，但其實當中既食材有好大分別；例如牧丹蝦既質感已經同白蝦有好大分別，牧丹蝦相對上更爽口。而牧丹蝦壽司上面既並唔係海膽而係牧丹蝦頭D膏，本身師傅已經稍作調味所以都唔駛再加豉油都好夠味。
接著落黎呢兩款壽司都係非常有特色，而我地都無係其他地方見過或食過，第一幅圖既係鯖魚壽司，經理特意同我地講解呢款壽司既最特別之處就係放係鯖魚面既昆布，昆布用醋浸過，食落同海藻有D似，主要係用來去走鯖魚既腥味，而昆布既下面再放左D薑絲同蔥粒，所以鯖魚壽司係完全唔腥同好夠味。第二幅圖既係鰻魚牛油果壽司，最特別之處當然係舖住壽司底果塊其實係食得既黃豆紫菜紙，鰻魚配上牛油果呢個配答其實相當唔錯。
刺身生菜包亦係福村另一道極具創意既料理，師傅利用左新鮮生菜包著三文魚刺身同脆脆係一個好新穎既配搭，但出來既效果又出奇地夾。第二幅圖既係福村壽司,亦係此店既西村先生自創既壽司，材料分別有三文魚子、拖羅蓉、海膽以及牡丹蝦；三文魚子甘甜、海膽好新鮮、拖羅蓉香濃、牡丹蝦鮮甜，如此既配搭絕對係天作之合。
燒拖羅壽司 – 黎到最尾既一款壽司啦，本身都已經鳴金收兵，但見到師傅即場炮製我至愛既拖羅壽司我又忍唔住流口水了。最貼切既形容絕對係入口即溶，充滿油香既肥美拖羅經過火炙後有D溶溶地既口感，加上結實既壽司飯只能說句“夫復何求“。
結尾最適合就係有一道完美既甜品做收場，今次福村為我地提供左一道時令日本柿甜品。經理建議我地先食日本柿，日本柿肉爽甜清新，更可以清新一下你既味蕾，食完柿肉先再食旁邊的紅豆奶凍，我覺得紅豆奶凍甜度適中而且奶香味濃。Omakase(廚師發板)有分三種價格，分別係人均$1300/$1500/$1800,今次我地選擇既係人均$1500。
Post
