盈翠軒 (Under Renovation)

睇咗 「PressLogic - Holiday假期日常」 嘅介紹而去試吓佢個大閘蟹放題。其實都預咗真實食物同報導會有出入，但係出入真係太大。先講大閘蟹，蟹好細隻，而且唔算多膏，味道一般。唯一好處係真係任食，兩個鐘內食到幾多都俾你。呢樣係真嘅。但係嗰6道菜真係好令人失望……「頂級鮮蟹肉燕窩羹」無蟹肉無燕窩，似係生粉水加蛋花。「生拆蟹粉小籠包」似一般小籠包。「蟹粉扒有機時蔬」sorry，已經無咗蟹粉變時蔬only。「花菇紅燒鮑魚」鮑魚邊有假期日常報導中咁大隻。雖則三百幾唔可以要求咁多，但係都希望見到少少誠意……而成餐最令人嬲 嘅係服務。無服務可言，嗰6道菜上菜次序仲要混亂之極。上菜亂上，之後幾個唔同嘅阿姐輪流問邊度菜上咗未，但係話佢知漏咗道菜時其中一個聲大夾惡企你隔離幾分鐘係咁話「你食咗啦，俾咗你啦」。算，真係唔係好恨食嗰6道菜。但係咁嘅服務真係永無下次。絕不推介呢間嘢。