泰豪燒 (Closed)

兒童節當日唔想走太遠，男友話呢間泰豪燒評價唔錯，就去咗試下！結果真係超級驚喜！泰豪燒主打串燒同海鮮粥，環境企理乾淨，價錢非常親民，食物意想不到地高質！點咗二人餐（$298），有大大煲海鮮砂鍋粥（自選兩款海鮮）+6款串燒+啤酒一支或汽水2罐，非常豐盛！ 先講下 串燒，非常有水準，質素比九龍好多串燒專門店仲要好！揀咗雞翼、粟米、司華力腸、蝦、五花腩同和牛粒（和牛粒要另加$10），全部都燒得外脆內juicy，完全唔乾。例如雞翼入面係嫩滑得黎有肉汁！ 牛油粟米都有一整條咁多，非常難得地可以食到燒粟米不但有牛油香，仲有燒烤香氣之餘唔會乾爭爭，好好味！和牛粒都真材實料，肉味濃郁，加上孜然粉更加惹味。我哋仲加點咗大啡菇 同燒白鱔，同樣冇令我地失望。大啡菇加咗孜然粉，多汁又惹味！燒白鱔肉質爽彈，啖啖肉叫人滿足！ 主角海鮮粥同樣出色，我哋揀咗蟶子同鮑魚，鮑魚剪粒，所以確實份量唔知有幾多，不過蟶子就真係好足，食到底都仲有！粥底亦好鮮甜，煮得軟綿，每人都分到4-5碗。要注意嘅係每日嘅海鮮都唔同，要問老闆！二人餐仲包飲品，好抵食！整體食物超水準，整餐我都讚不絕口，不停和男友商量何時再來，哈哈。