和花亭壽司 (Closed)

本來話左半年內都唔會再黎，但係冇辦法，愛人要食壽司，觀塘選擇有限，惟有自打嘴巴又黎食過。半價時段入去，星期六排左大概一個鐘頭先有位。今次終於記得影相，講下一Ｄ我未講過的食物評價。17蚊一碟一件特大灸昆布鯖魚腩壽司，肉質口感比13蚊一碟兩件昆布鯖魚壽司爽，但不見得特別好味，只係塊魚肉長少少，個人覺得唔算抵食。10蚊一碟兩件玉子壽司，做得比好多壽司店有誠意，其它店只會就咁整熟就算，反而和花亭係用鑊煎熟再一層層摺埋而成的（去過上水分店的食家就有機會見到師傅即場煎蛋）。而且佢有一大特色，常見的玉子壽司係在壽司飯上面加塊蛋再捲紫菜，而和花亭係在蛋入面塞少少飯再捲紫菜，所以係蛋多飯少，而且蛋味甜甜地，我每次去都有叫。35蚊一碟兩件海膽壽司，外觀睇落新鮮，但係冇咩鮮味。曾經試過一次有海膽屎未挑乾淨，食落口會有一大朕異味。18蚊一件三文魚魚子手卷，之前我寫過佢地可能轉左供應商或者貨種，所以水準下降。唔知和花亭方面係咪有人會上OPENRICE睇食評，所以我今次再試，竟然食得番半年前的三文魚子。如果係真的話，呢個真係抵讚！