甜品方面見到佢新出左一款名為榴槤嘅蛋糕，其實我自己係一個榴槤控嚟嘅不過就見佢成份好似冇榴槤，所以我就冇叫啦，有興趣嘅朋友可以試吓。
上次都講過其實我最鍾意食嘅唔係佢嘅甜品而係佢嘅蛋治，真係做得好出色同埋好好味，亦都係我今次再嚟嘅目標，今次依然係保持水準所以大家如果想打卡嘅同時又真係好想食飽肚嘅嘢，不妨可以試吓依個蛋治！真心推介！
蛋治係有set餐咁所以其實係可以再加錢使佢好出名嘅朱古力，其實我上次都試過並唔係話真係超好飲，但係以香港嘅水平來講其實真係算相當唔錯，而且朱古力味好濃。我之所以話唔係好好飲係因為我試過法國嘅超好味朱古力，所以先會覺得佢失色，但如果以香港比其實佢都好飲過好多間。
另外今次仲試咗個雪糕，應該係夏日限定款，雪糕方面其實都整得幾滑幾濃幾好味，外貌方面就保持非常之高質素嘅水準。
其實嚟依啲店食野，有時真係為咗打卡同埋賞心悅目囉，但其實個價錢真係唔平，你問我想食差唔多水準嘅食品有大把選擇，但係如果你係想打卡依度就係唯一選擇。
