發現菜牌改掉，想食鮑魚雞煲無，想食蟹糯米飯都無。全場水靜鵝飛，食客小貓兩三隻。淨係剩班阿叔伯婆嬸包房唱歌打牌，嗌到鬼殺咁嘈，唔講以為打緊齋做法事添呀﹗
上湯焗波士頓龍蝦伊麵，約一斤龍蝦真的太細，醒唔起唔夠四個分。幸好都新鮮爽彈，少食多滋味。伊麵嚥韌無過腍，勁索靚汁﹗實在太多蔥花，青味太濃吃不消，全家只有阿爸食蔥的﹗我就細細粒綠蔥都可以，大大粒都要挑走。芡汁厚厚杰撻撻，味道濃濃未算過份。燒鵝半隻，只需要 $220 蚊？平過海港幾十蚊喎，不過海港係大號鵝，樂天就只係小號。高質滿意，皮香肉嫩，醃味清爽，肥瘦適中，無話肥膏處處。
砂窩海膽炒飯，已改上菜方法？上網睇 openrice 見到兩板海膽另上，再自己親手撈的喎。窩蛋被熱熱的飯灼熟，保持滑滑的。炒得香口帶著雞蛋焦香，海膽鮮而不腥，不過份量太少。配料得蔥花及脆肉瓜粒好單調，味道寡寡的。好采有燒鵝食有一字骨送飯，好味得多了。清蒸龍躉一斤，大細剛剛好，太大條肉韌不好吃 ﹗師傅竟然失手，只得七成熟無奈要打回頭翻蒸，變得乾鞋柴皮，魚汁魚鮮全部流失殆盡，完全浪費﹗入得口唔難食。
油爆鮮魷魚筒，何解要斬件呢？必須要原隻吊桶原汁原味才是頂級，無需要畫蛇添足分屍吧 ﹗炒得有鑊氣有香氣亦惹味，奈何鮮味微弱。冰梅醬一字骨，非常好食無得彈 ﹗先炸後炒，酸甜味得宜，質地彈彈有咬口啖啖肉，酸胃醒神，啜得乾乾淨淨。
冬瓜盅，熱辣辣燙到嘴仔甩皮了 ﹗最衰越熱越好飲，灼到損晒的在所不惜。清甜香純，落肚好舒服，熱騰騰連飲幾碗﹗百味交集，豐富美味，有蝦有肉有勝瓜有草菇。冬瓜熟得透切吸盡濃郁湯汁，豉油都慳埋，被我食掉大半個，非常可口﹗
拔絲咕嚕黑豚肉，外層炸得香脆，整件釀入嘴嚼，結實有趙頭，略厭有少少乾。咕嚕汁強勁酸味，淺淺的甜緊隨著，中規中矩。何解用生彩椒墊底呢，沙律嗎？青紅黃椒全部都是生的，連洋蔥都是生的，故意的嗎？
賽螃蟹，細妹指定菜色。炒蛋白好滑溜，不過油淋淋，加醋會好一點。鹽味帶子仔仔，應該叫貝柱更適當，即是帶子筋位。無鮮味只有鹽咸味，啤水假爽，本身應該清淡但演繹得又咸又油。
薑蔥桶蠔煲，蠔真的不是越大越好食，中碼最嫩最肥美。依幾隻巨蠔有渣帶腥而太老，裙邊及帶子位都要吐掉。先炸後炆，厚厚炸粉腍劈劈還黐牙添。濃濃薑蔥味留在外，咬開蠔肚剛剛夠熟，蠔汁微甘免免強強。有想去掉外殼先食的衝動，最後都係懶，求其吞落肚算數。
上湯焗本地龍蝦，本地龍蝦？香港有出龍蝦架咩，港龍自己養殖？貌似花龍，味似青龍，爽爽結實有鮮味，淋上清淡高湯芡恰到好處，沒有蓋過其天然龍蝦味道。冰鎮鮑魚秋葵，豉油唔係刺身豉油，估計係蒸魚豉油所以好咸，跟山葵味道完全唔夾。秋葵刺身？唔覺有烚過。雖然非常有益健康有營養維他命，不過滴住滑潺潺的黏液使我卻歩，免強食一條。實淨冰涼九孔鮑，淡茂茂的，沾上咸咸蒸魚豉油，不喜歡。
鴻運金豬伴天鵝，到底天鵝係咩味架呢？從來未食過！燒味雙拼是也。乳豬皮薄薄脆脆，黏著油膩白雪雪肥膏，食不到瘦肉。燒鵝上庄，使人期待的天鵝肉，雖然鵝胸啖啖肉，敝在帶鞋不夠嬌嫩。黑松露翡翠炒蝦球，西芹少少粗糙少少乾，幸好食到菜甜味。蝦球腍腍的，輕醃散發黑松露醬味，搭著西芹食可以的。
杏汁燉白肺，超等特濃雞湯底，說好的杏汁呢？南北杏都無粒。不過堅濃郁，香味四溢，鳳脂甘甜，像食緊鮮雞一樣。所有湯渣都好好味，用豉油點綴一下已非常滿意。豬肺處理得徹底乾淨白雪雪，乾綿綿彈彈的。雞腳膠黏充滿骨膠原，損腳指格外開心。
蜂巢香芋日本帶子，討厭芋頭的我都覺得好食喎 ﹗外層炸得乾爽鬆脆不油，芋蓉沒有半點霉味，只有清甜味道，乾乾的包著帶子，有創意。帶子薄切，起碼一開三，不太食得到味道。多種質感融合，乾濕脆綿軟滑彈，食得愉快高興。
清蒸海方脷，薄身撻沙類不用蒸太耐，平時食斑一斤左右蒸 11 分鐘剛剛熟，依條 8 分鐘已經好足夠。少少蒸過火，耐了一丁點，未算太老太鞋。方脷無細骨容易食，嫩嫩的肉拖著魚汁連豉油大片大片地享用，幸福啊﹗
