餐牌上有超多選擇，基本上講得出嘅都有
肉類有雞牛豬羊，蔬菜選擇都好多，另外仲有海鮮。
1
一坐低好肚餓，咩都唔諗，嗌個招牌三重芝士撈丁先。三重芝士包括藍芝士、巴馬臣芝士同車打芝士，芝士味非常香濃，藍芝士味好突出，同一般餐廳嘅芝士撈丁只得陣奶味好唔同。丁麵煮得剛好，仲有少少咬口，唔會太腍
平時燒嘢食最鍾意食燒雞翼，呢度唔使自己燒就有得食，啱晒我呢啲懶人
燒雞翼醃得夠入味，中間雞肉嫰滑仲有肉汁，如果雞皮可以燒得脆啲就更加好。
見到滑雞片寫住脆皮所以都試下，雞皮真係烤到脆卜卜
雞肉嫩滑，醃得入味但唔會過鹹。雞扒份量都幾多，一份有三件。
蔬菜就叫咗燒韭菜同茄子，韭菜搽咗醬汁燒唔會太乾身，食落完全無渣。茄子表面鋪滿蒜蓉，茄子肉燒到好腍而且好juicy，夾埋勁多蒜蓉非常惹味
燒粢飯聽落好有趣所以都點咗個試下，係糯米飯中間夾住一層肉鬆。糯米表面有少少微燶，有啲飯焦嘅感覺，幾香口。如果中間有埋油炸鬼同榨菜就好喇，餡料只有肉鬆，味道同口感都比較單調。
美國牛小排燒至五成熟剛剛好
食落感覺唔太肥膩，牛肉味濃。
燒鹿兒島豚肉串係五花腩，肥膏燒過之後變得無咁油膩，但仍然好香豬油味，而且肉質帶點爽口
安格斯肉眼牛柳串肉味濃郁，肉質軟腍串燒全部都有落少少辣椒粉調味，食落微辣好惹味。枱上亦有提供孜然粉同辣椒粉，鍾意食重口味可以自己再加。整體嚟講串燒選擇多，食物質素好，幫襯過幾次都保持到水準。
