餐牌選擇唔算好多，有麵、飯、滷味、小食、炸物、台式飲品等，定價稍高，考慮到地段加上屬明星食堂，都理解。由於當日打風，蒜泥白肉、蝦捲未有供應，好在想食嘅都有呢
紅燒牛肉麵 $75
另外仲供應招牌嘅三星牛肉麵，分別除左牛肋肉，會有埋牛筋、牛肚。紅燒牛肉麵嘅賣相唔錯，牛肋條足足有四大條，仲有兩片忟得腍身嘅蘿蔔，麵條扁身，類似「請坐」，食落唔會太硬，有嚼勁，口感唔錯，麵量頗多，掛湯力有待加強。湯底方面，店方強調絕無加入味精，熬足廿四小時，個人認為就未係好濃郁，不過加左豆瓣醬，飲落微辣帶牛味，有需要可以加入自家炒製嘅鹹菜，食完都唔會特別口渴呢
牛肋條未至於入口即溶，事實上都已經忟得好腍身，亦冇筋冇渣，保留牛肉嘅口感，紅燒牛肉麵黎計，都幾出色
阿嬤魯肉飯 $42
比起好多有名嘅魯肉飯，定價都係高出少少，不過飯量相對多一點，仲有半隻滷蛋同酸瓜。魯肉切成幼條，肥瘦雙隔，肉汁就唔算多，食落唔會太鹹亦冇油膩感，魯味濃度一般，家常飯嘅感覺，不過肉嘅份量再多啲，性價比更高。滷蛋硬身，似豬腳薑蛋嘅口感。飯唔會太硬或黏身，味道都唔錯呢
滷味大腸 $46
大腸口感好軟熟，清理得乾淨，沒有一絲異味，切成幼身薄片，便於咀嚼。滷水味比魯肉飯來得強烈，因為滷汁很豐富
KTV香腸 $42
個人非常喜歡食台灣腸，雖然價格稍高，不過份量都相對多。腸仔切得很薄一片，輕輕煎過，唔係白烚，油份浸出，令香味更突出。
第一鹽酥雞 $48
鹽酥雞冇骨，啖啖肉，新鮮炸起熱辣辣，食落酥脆，炸粉都唔厚呢，雞肉都保持嫩滑唔老，亦唔會好鹹或者太熱氣。
台式飲品選擇頗多，有奶茶、冬瓜茶、仙草、拿鐵等，甜度冰塊自選，亦可按喜好加入配料，例如珍珠、紅綠豆、蘆薈、仙草，定價$24-42，未有跟餐價，或許會令好些人卻步，但其實質素都唔錯。
香芋拿鐵 $31
上枱時有明顯嘅漸層，仲有珍珠，飲用前搖勻。入口香芋味好濃郁，具體啲黎講係同溶左嘅雀巢香芋味雪糕相似，飲落幾滑溜，奶味唔會蓋過香芋。珍珠比較細粒，咬落都幾煙韌呢。
仙草奶綠 $38
中規中矩，茶味稍被奶味蓋過，仙草份量都幾多，比較膩口，加上已經食得好飽，所以都未能飲哂。
黎之前都睇過唔少報導同評論，自己一向都相信口味係好個人化嘅，作為參考，個人就並冇抱很大期望前來。正唔正宗我唔敢講，即使係台灣人主理，各家食材秘方都唔同，而最重要係搵一間啱自己口味的
餐牌：
餐廳：
