阿四車仔麵 (Closed)

今日有d趕時間, 整個快靚正車仔麵先! 話時話而家d車仔麵唔再嗱渣, 好多都裝修到靚靚仔仔成間冰室咁, 今日食依間阿四就係其一,  而家食野最緊要乾淨企理!好肚餓叫左6餸! 滷水腩肉, 牛腩, 瑞士雞翼, 蘿蔔, 雞翼尖, 溏心蛋飯, 又擺得幾靚仔, 最吸睛係個滷水腩肉, 估唔到佢咁大塊同埋肥瘦相間, 入口果然邪惡, 好香, 另外溏心蛋都好正, 溏心狀態岩岩好, 仲有d醉蛋既味道~ 飯就簡單配個腩汁已經好ok~ 加杯紅豆冰, 夠濃又多紅豆!朋友叫左個魚蛋, 蘿蔔,  炸墨魚卷, 豬大腸同瑞士雞翼油麵, 魚蛋可能浸左湯所以唔辣, 豬大腸大舊有咬口, 最緊要係非常乾淨同埋冇一舊舊肥膏痴住, 炸墨魚卷彈牙幾好食~ 配埋麻辣醬, 枱上仲有店自家製既辣菜圃, 加埋落去仲惹味! 叫左支樽仔奶茶, 茶味香入口滑, 而且唔算好甜, 好岩佢口味咁話wo~叫個油菜食下, 新鮮又嫩綠, 而且中意佢冇乜油!