百味閣餐廳

Open Now

Now Closed

之前經過浸會附近發現有一個細商場, 入邊有間香港懷舊式西餐廳, 所以今晚決定去試吓。佢店前店內裝潢就好似九十年代嘅香港港式西餐廳, 侍應都着咗西式工作服。入到去店內面積都幾大, 七點半去到都坐滿八成人, 有部份枱與枱之間有塊小小既白窗簾仔可以分隔,都令人幾有私隱度。翻開Menu其實有好多選擇, 又有肉類又有焗飯又有意粉又有碟頭飯真係乜都有。因為好肚餓, 我哋最後決定揀兩個西餐套餐加一個焗嫩雞配茄醬意粉, 套餐有湯有主菜又有甜品又有餐飲。第一個揀咗香草薄荷醬焗羊仔扒而第二個就揀咗法式鵝肝牛柳, 甜品仲有南瓜焗布甸。主菜一黎到賣相已經滿分,首先個嫩雞真係非常滑意粉亦都唔林剛剛好茄肉醬份量味道亦剛好。羊仔扒份量亦非常多而且好嫩好林, 味道亦出色。而我覺得最出色係鵝肝配牛柳, 侍應話鵝肝牛柳一定要一齊食, 我將佢切開一份份一齊食, 味道果然出奇地夾, 真係從來冇諗過咁樣一齊食。甜品南瓜焗布甸亦係用心吾馬虎, 一切開入面見到有一粒粒南瓜, 吾太甜吾錯。整體來講以呢個價錢食到一間港式懷舊西餐廳食物又唔錯真係性價比高。真心希望呢啲港式老餐廳可以繼續落去, 令香港市民食到懷舊又性價比高嘅港式西餐。