九重鮮 (Closed)

星期日晚去到黃浦花園，當然就係想食好啲。呢間九重鮮，食盡韓式風味嘅蒸海鮮，感覺夠晒滿足。先有韓式嘅小食嘅拼盤，傳統食法係將蘿蔔片作底，卷著紅椒、青椒、甜蛋、牛肉碎等配料，感覺有啲似中式嘅片皮鴨，清新開胃，正好迎接重頭戲。一共6層嘅海鮮，第一層有花膠魚板串，花膠夠晒厚身，食得出厚厚嘅膠質感覺，真係可以補充到骨膠原。接著有大元貝，原汁原味咁蒸，保留左元貝本身嘅精華，鮮味特別濃郁，而白晢嘅元貝，彈牙十足，選料確實上乘。原隻加拿大肉蟹，淨係個份量都夠晒驚人，蟹黃滿滿地鋪著，邪惡感十足，而蟹肉因為夠結實，所以進食時候亦唔算唔方便。接著嘅海鮮拚盤，有花螺、八爪魚鬚、海蝦等等，同樣啱晒中意食海鮮之人，各樣海鮮因為蒸嘅時間啱啱好，夠熟之餘，亦完整保留住鮮味。再跟住有蔬菜、西蘭花等食材清清味蕾，就係食海鮮粥嘅時候。唔需要加入任何調味料，粥都吸收左海鮮嘅精神，有著天然無添加嘅味道。