一沢拉麵 (Closed)

是日風和日麗，我地去到尖沙咀閒逛，見到中間道新開嗰間谷＿，入去打咗個白鴿轉。然後行過去K11 Musea搵嘢食。我地落到地下Food Court，嗰陣約莫七點，已經坐滿曬人。我地行咗個圈睇下有咩食，然後再搵位。搵到位之後，我地就揀咗這檔拉麵店，因為都有一段時間冇食拉麵喇！我地不約而同地點咗同一款「辛口叉燒拉麵」，只係$78。店員就俾咗個BB機我地。等咗5分鐘左右，個BB機震動，咁我地就去取餐，非常方便！拉麵湯面層有紅色的辣油，我仲喺取餐處落多一匙羹「一味粉」添。點知飲咗一口湯，都幾辣喎！同平時食開聲稱嘅辛口係更高級別，真係有啲辣喎！湯底唔知係咪豬骨湯，唔算太濃味。溏心蛋係原隻上，咬開裡面軟綿綿，好有蛋味！同埋叉燒係厚切，雖然只有一塊，但係都已經好滿足喇！以後又多個食拉麵嘅好地方啦！