Grandco Seafood Restaurant (Closed)

　擒日小弟舊曆生日，家姐咁啱又再在附近辦公事，唯有去呢間都幾墮角嘅酒家試下。其實我以前都有幫襯過呢度前身嘅韓國餐館，可能生意唔好冇做啦。
　諗住叫幾個小菜：砵酒焗桶蠔、什菌炒和牛粒、麵醬炒唐生菜同鵲巢海中寶。已經一早問咗樓面有冇桶蠔，況且都唔係平（八十八元），佢話有咪落單囉，誰不知過咗冇幾耐佢話冇蠔喎，都算啦，唯有叫半隻炸子雞啦！
　好嘞！諗住叫兩碗白粥，佢又話冇，喂大佬呀，擒日又唔係假期又唔係好夜，六點零鐘啫，呢樣又冇，嗰樣又話冇，我家姐好勞氣，個經理都知衰，起勢咁講對唔住。
　至於餸菜啲質量方面，算中規中矩啦，除咗炸子雞啲頭頭尾尾之外，好多都食到清為止。食完飯都有幾楷橙當係飯後果，美中不足嘅係冇糖水送，要自己叫，雖然唔係貴（楊枝甘露都係十二元，芋頭西米露八元），但埋單都要三百幾蚊，雖然唔係小弟找數，但都戥家姐肉赤。
　人客到走嗰陣（七點半）都坐唔夠一半，咁嘅服務質量，下次都費事嘞。