首先先黎幾個餐包仔, 包種幾好, 好香, 不過係凍左小小, 跟住個蘑茹湯同埋洋蔥湯, 蘑茹湯超香, 好濃郁, 好快就比我哋清碟, 跟住個洋蔥湯賣相就麻麻地, 不過都係好飲
之後就開始上主菜, 乳鴿意大利飯, 乳鴿燒得好香, 好有肉汁, 乳鴿雖小, 但勝在味道夠, 而個意大利飯真係令我好驚喜, 自從喺歐洲食過正宗意大利飯後, 喺香港都好難再食到, 因為香港D意大利飯已經變得好港式, 全部都”林啤啤”, 我鍾意佢的意大利飯, 好有口感, 抵讚
再黎就係炭燒西冷牛, 淨係見到嗰D一格格網紋, 已經垂涎三尺, 好香好嫩, 好有肉味, 我冇點個紅酒汁, 因為我鍾意就係嗰種網燒味, 真係好正, 有種苦苦哋嘰味, 超正, $208抵食
跟住到慢煮黑毛豬, 好淋, 可能我鍾意食牛多D, 所以就OK啦, 不過不失, 但我就鍾意個配菜, 黑松露薯蓉, 好香呀~~~
再黎煎鱸魚, 外皮好脆, 肉好滑, 可能份量較小, 我哋6個人都係每人一小件試下, 不過下次我會再食, 可惜今次冇影相
最後就係最吸引的海鮮併盤, 好大盤呀~ 成SET長腳蟹, 份量十足, 好香, 好入味, 盤下面D配菜全部都好入味~ 如果兩個人食就真係超飽喇~
我哋6個人SHARE食就差唔多.
餐廳環境比人有個好輕鬆的感覺, 唔會好似去酒店咁咁拘謹, 起碼講吓嘢都唔洗比人昅住嘛~~
1
後話: 當日聽到隔離枱有人話個意大利飯生米, 又話個扒燶左, 我其實心理真係好想笑出口,
因為正宗意大利飯就真係好似生米咁嘰口感嘛~ 同埋人哋個扒都講明係炭燒, 咁緊係會有D炭燒味啦, 唔識咪話係燶係苦囉~~ (我其實好想同隔離枱講, 不過見佢好火, 我就免得多事啦, 哈哈
)
