餐廳內嘅裝修甚有日本居酒屋嘅風格。
既然呢度係主打蝦湯，當然要揀番個濃厚蝦湯拉麵。呢度每款拉麵都會配有筍、蔥、溏心蛋半隻、紫菜同慢煮叉燒。
除咗有濃濃嘅蝦湯，仲有大量嘅櫻花蝦，令整碗拉麵蝦味更加濃郁。
而我就特別欣賞佢嘅溏心蛋，蛋黃醬混入蝦湯拉麵真係好鮮好夾。
除咗拉麵，呢度仲有沾麵，我哋就揀咗神匠蕃茄蝦湯沾麵。沾麵同樣配有筍、葱、溏心蛋、紫菜、慢煮叉燒，更特別嘅係另外配有法包配羅勒醬。
沾麵嘅蕃茄蝦湯味道超濃郁，蕃茄同蝦湯嘅味道互相輝映，唔會搶咗另一食材嘅味道，加上同樣有大量櫻花蝦，用彈牙嘅拉麵沾上呢個濃湯真係好滋味。
另配嘅法包塗滿羅勒醬，其實單獨享用都已經夠好味。
每款拉麵或沾麵都會配以醃青瓜作前菜，味道酸酸辣辣，非常開胃。
我食拉麵習慣都要配返個小食，炸日式餃子外皮脆口而餡料亦豐富。
飲埋支冰凍嘅汽水真係透心涼又滿足。
