放假去咗朗晴坊配眼鏡，順便喺嗰度食午餐啦。我哋去咗位於四樓嘅「茶屋町」，本身以為佢係日本嘢🙈，但原來係主打家常小菜。
餐廳行小清新路線🌿，加埋呢日有陽光，環境更顯光猛。朗晴坊每層面積相若，不過餐廳似乎好識利用空間，座位數量唔算少，但就無迫夾嘅感覺。食完先知原來餐廳仲有室外座位，好Chill！
午餐選擇約有二十款，👀花多眼亂。當中港式家常小菜佔最多🏡，但亦不乏日式選項。價錢介乎$58至$68不等，包飲品，都唔算貴。
茶屋町同時亦係一間Cafe，所以佢提供多款特飲🥤。
草莓酸甜咕嚕肉($60)，咕嚕肉食得多，多數係配菠蘿。不過呢度就好特別，係配士多啤梨㗎🍓，食落味道無咁酸，仲幾惹味，而且你更搵得出草莓嘅蹤影。咕嚕肉排大大件，因為冇骨，所以食得好暢快，連埋大量紅綠燈椒同洋蔥，份量超多！留意番，午餐仲包一碗白飯添🍚，好難唔飽。
蕃茄濃湯牛肉烏冬($62)，牛肉烏冬同樣以份量取勝。湯底雖然叫濃湯，但我覺得稍為偏淡，估計唔係用茄膏開，相反面頭就有唔少蕃茄碎🍅。肥牛片有四至五大塊，唔會唔夠餸食個烏冬🍜。另外，佢仲有隻烚蛋添🥚。烏冬方面，粗身兼滑嘟嘟，但唔難夾。
飲品方面，我哋轉咗特飲(+$12)，分別係🍍鳯梨多多同☁️Blue Sky。兩杯造型好極端，一肥一瘦，一藍一黃，不過共通點就係好大杯，同埋味道都唔錯。我飲Blue Sky，即係由乳酸、檸檬同梳打組成，味道似可爾必思溝檸檬梳打🍋，但記住要攪勻飲，否則底部會好甜。
總括嚟講，茶屋町整體經營得幾好，喺附近返工不妨試試，環境舒適，午餐選擇多，價錢合理。最後，我特別要讚一讚樓面位年輕男店員，佢態度誠懇，好好禮貌😁。
