），仲要獨沽一味只有沙嗲牛肉，每串$0.5，一放學就人頭湧湧圍住個原始炭爐買串燒，炭香撲鼻。時至今日，串燒已發展得多變，今晚就跟朋友嚟到山林道嘅「串燒」嘆串燒
。
這家店真喺幾隱蔽，雖然位處食肆眾多嘅山林道，又喺地鋪添，但因為鋪門唔喺開晌大街，而喺瑟縮入咗條小巷內，差啲過門不入行過咗
。用餐環境分室內和室外，前者比較簡單，木枱膠椅，裝修亦都簡單；反而室外露天位有啲特色，一片峉里風情，大陽遮，藤椅梳化，不過，食串燒熱鬼辣辣，等秋涼坐出面就適合啲。另外，有樣幾貼心嘅設施，就喺可放背囊或手袋嘅雜物籃:)。
未講到串燒選擇，餐枱紙有張介紹「串燒」嘅資訊，例如：串燒嘅由來、跟其他地方嘅串燒有咩分別……等等，可能文字太多，亦有啲沉悶，嘥咗店主一番心思。
不過，串燒種類甚至選擇，由雞類、豚肉類、海鮮類、飯類、蔬菜類、牛肉類、腸及丸類、羊肉類及燒芝士類，足足有70多款
，全部即叫即燒，需時製作，所以都講明要耐心等候。雖然有另一個膠餐牌有少部份圖片及編號，但個人認為張點餐紙加埋編號會實用啲，尤其好幾個朋友傾緊點咩嘢食時，講「冧吧」始終易過嗌菜名
。
由於唔肯定啲份量喺點，所以，邊點邊食，邊食邊再叫，好喇，就由有趣嘅餐具開始啟動，分享我哋點嘆串燒先。
蒜燒雞脾菇煙肉卷 $32 / 2隻:)
將煙肉捲住雞脾菇嚟燒，有點新意，煙肉燒香後入口有啲脆，而雞脾菇沾滿煙肉嘅油香，味道寧捨甘香，而雞脾菇本身又有點咬口，不過，蒜香欠奉喎:(！
香草牛油燒花甲 $48:)
花甲算喺幾大隻，亦都幾好肉，入口感覺新鮮，富香草香味，唯牛油味都未夠突出，可以重手啲都無妨。
扎幌鰻魚汁燒比目魚 $88:):)
比目魚大件頭，塗滿鰻魚汁，燒好後又糝唔少芝麻，份外芳香。比目魚肉質幾挺實，唔會一夾就碎；個鰻魚汁調校得又幾香濃，令成條魚都好香好食
。
首創惹味魚香燒原條茄子 $45:)
從餐牌所見，依個屬於店主推介，燒原條茄子何來首創呢？首創喺加咗「魚香」，可謂「魚香茄子」燒烤版。燒透嘅茄子口感十分軟腍，質感綿綿，茄子表面加上好多魚香肉碎，確然幾惹味。
海鹽燒巴西厚切牛舌 $38 / 串:):)
又喺另一款店主推介嘅串燒，牛舌果然厚切，切得真喺頗厚身，而牛舌質感富咬口，有嚼勁，簡簡單單海鹽燒，就托出牛舌獨有嘅味道，真喺好食:)。
紫蘇葉香燒羊仔柳 $28 / 串
羊串燒得好少選擇，一喺羊仔柳，一喺羊鞍，羊鞍有點貴，所以揀嚟羊仔柳。一串有5粒，羊羶味唔重，不過紫蘇葉令啲羊仔柳有朕香味，肉質都還可以啦。
雙重芝士燒純種杜洛黑豚豬腩 $58 / 2串:):)
店方特別加有一類叫「燒芝士類」，仲註明用日本芝士加車打芝士碎，當然好有興趣，而且，有一款叫甚麼杜洛黑豚，老實講，小弟見識少唔多知佢來頭，問過店員先知喺西班牙貨色
。雖用上豬腩，出嚟效果無想像中咁肥膩，又有啲燶邊位，幾有食叉燒嘅感覺，沾滿濃香嘅芝士，極為惹味。
食串燒不外乎揀飲汽水，但小弟就喜歡王老吉（$17罐），但依家晌國內就慣叫加多寶，可以清熱解毒嘛
！
「串燒」嘅做法下醃料唔多，大都可以品嚐到食材原味，不過，消費實在唔平，可能因為始終開晌尖沙咀，就算位處巷仔內，鋪租都唔平得去邊，食幾串嘢已過百嘞。招呼好好，店員反應夠快，整體食物味道其實都唔錯，但名為「燒烤專門店」，食咗成晚，感覺總喺欠缺一啲令人有難忘嘅招牌主打串燒啫！
