樂燒樂茶 (Closed)

呢間位於太子雷生春附近嘅日本串燒店主要做外賣同台式茶飲，設有少量摺枱同凳可以坐低食，天氣咁熱，我同朋友梗係拿拿臨坐低嗌杯凍飲消消暑啦！白桃綠茶同荔枝烏龍好快整好，嗌左少甜少冰，飲落啱啱好，唔似出面嗰啲好淡嘅茶味，呢杯茶味濃香，入口甘甜，消暑解渴一流！因為我同朋友都唔係好餓，所以冇試到佢哋嘅丼飯，只係叫咗啲小食同串燒：芝士雞肉、日式餃子、芥末雞肉、免治雞肉棒、雞腎、雞軟骨、牛舌、 蒲燒鰻魚、粟米、芝士年糕，食物整體質素唔錯、入味又唔油膩，搭配嘅醬汁都有驚喜🤣個人特別鍾意佢哋嘅日式餃子，外型似鍋貼，但同出面一般鍋貼唔同，食落入面嘅餡有少少脆，醬汁有少少辣，我同朋友食完都想再叫多碟！老闆娘好nice咁同我哋介紹茶飲同嘢食，見到佢哋餐廳有牛油果烤雞卷餅同辣椒他他脆雞飯卷都好吸引，下次一定要嚟試吓！