東園酒家宴會廳 (Closed)

平時西餐食得多，今次食下中菜。呢間位於灣仔既東園酒家幾就腳，係灣仔地鐵站修頓球場對面，好易搵。一入到去有姐姐指示上去二樓，平日既晚飯時間都坐滿曬人，仲見到有好幾枱外國人添！枱同枱之間坐得幾闊落，幾舒服！我地兩個人叫咗三個餸一碗白飯，欖角骨，福建籠仔蒸豆腐，南乳粗齋煲。欖角骨，酸酸甜甜，好入味！外面應該有炸過，但係唔會好厚粉又唔會好油膩，做餸一流！福建籠仔蒸豆腐，用荷葉蒸所以好大陣荷葉味，好香！豆腐都好滑，加埋平時食福建炒飯啲料，成個感覺又幾特別。南乳粗齋煲，有好香既南乳味，但係陣味又唔會太搶。加埋啲菜，豆芽，豆卜，粉絲，成個煲感覺好健康。成餐飯總概係幾滿意，服務員態度都好好。