今次嚟到中環嘉咸街呢間「鳥駅」，真係有驚喜！一入門口，環境夠晒闊落，好有空間感。坐低吧枱位，望住師傅即席炭火燒鳥，火光熊熊嘅表演，未食已經先興奮！枱面放住杯冰涼嘅啤酒，一路飲一路等串燒，個氣氛chill到呢～完全係打工仔放工減壓聖地！
講到食物，個「鳥の職人嚐味套餐」簡直係雞嘅全身解剖圖鑑！前菜漬物醒胃，慢煮松露雞卷肉質嫩滑，雞肝茶碗蒸濃郁得嚟唔腥。
嚴選雞部位嘅雞翼燒到脆皮爆汁，大蔥雞腿肉嫩滑得嚟帶炭香，雞腎爽口彈牙！仲有啲稀有部位串燒 —— 雞肝甘香綿密、雞喉嚨勁爽脆、雞臀尖油脂香超惹味。
野菜串燒嘅秋葵同銀杏簡單調味，清新平衡返油膩感。慢煮三黃雞白湯飲落濃厚如膠，暖胃又滋潤！廚師長特製嘅香烤鴨肝，外焦內融化，邪惡好食～ 最後親子丼同雞湯烏冬，一個蛋滑雞香，一個湯清麵彈，好彩兩個主食都有得食，唔使揀！抹茶芝士蛋糕配雲呢拿雪糕，冷熱交融，甜度啱啱好，為成餐畫上完美句號。
總括嚟講，鳥駅由環境到食物都係高質體驗，稀有部位夠特色，唔係度度食到。師傅手勢穩陣，上菜快狠準，燒鳥迷必到！
