令酒場 (Closed)

日本料理不嬲係港人嘅至愛。近呢兩三年因疫情關係冇得去日本旅行，唯有喺香港周圍搵吓有邊啲性價比高嘅日本餐廳試吓。今次去咗呢間開業只有幾個月嘅「令酒場」，餐廳主打日式居酒屋美食，尤其串燒特別受食客歡迎。趁星期六、日唔需要返工就約朋友去呢度食午餐。呢間居酒屋嘅裝修以紅、黑為主色調，比起其他居酒屋屬於摩登設計。午市套餐都有幾多選擇，生熟食物由刺身飯到壽喜燒都有。每份午市套餐包括前菜、沙津、麵豉湯及汽水。前菜、沙律及麵豉湯會放喺一個小木盤一次過送上俾客人。前菜會定期跟換，當日我哋食嘅係豚角煮。▫️原條燒鰻魚套餐 (HKD188) - 原條鰻魚好厚身，上面鋪上大量紫菜絲，賣相確實係幾吸引。整體上味道唔錯，如果鰻魚可以再燒一燒令到外層脆身少少嘅話就perfect喇。▫️海膽帆立貝丼 (HKD268) - 想好似我咁貪心要試埋串燒嘅話就要留意「串燒丼飯自選套餐」餐牌喇😆😆呢個餐牌上嘅主菜係配自選串燒兩串。芫荽豚肉卷同埋秋葵串燒上枱後店員迅速向我哋推介居酒屋三款自製嘅鹽：柚子、紫蘇葉同埋竹炭。我認為唔同口味嘅鹽配肉類會惹味啲呀。海膽帆立貝丼裡面嘅刺身都幾新鮮，尤其係海膽，味道鮮甜，冇見到溶化或出水嘅情況👍🏻