韓式人參走地雞湯叉燒麵 $88
湯底係帶有淡淡人參味既雞湯，一路食麵一路飲湯，好岩呢幾日天氣凍既時候食，雞叉燒肉質嫩滑，我比較欣賞佢個溏心蛋，真正溏心，就算日本拉麵店都未必間間做到溏心。
蝦籽花膠撈麵 $88
花膠配上香菇，再用濃郁高湯熬製而成既自家醬汁，撈埋一齊食，好香好好食，特別係個香菇，整得又淋又濃味，同埋個麵都好爽口。
麻辣雞軟骨雞肉抄手配擔擔波浪麵 $78
呢款係最新出既，如果平時鐘意食麻辣米線酸辣粉之類，食呢個就岩啦，抄手上面有少少麻辣醬，麻辣味適中唔會過辣，同雞髀肉餡料各味都平衡，餡料仲加左雞軟骨，增加口感，擔擔麵唔一定係湯既，我係第一次食撈既擔擔麵，整體上呢款抄手撈麵感覺創新有驚喜!
本地蜂蜜和走地雞蛋撻 $9
因為加左蜂蜜，比平時食既蛋撻會再甜少少，我食蛋撻最鐘意食酥皮，所以呢個酥皮撻馬上加左分，好食!
另外令我好欣賞KIN 既係，KIN 麵既外賣盒係可以循環包裝，由農業副產品同以小麥加工而成，係100% 可生物降解，可以減少環境污染! 如果叫完外賣，之後將外賣盒退返去KIN麵，可以儲E-stamp得到小獎勵又為環保作出貢獻，一舉兩得。
