老實講，望住咁花多眼亂嘅陳設，坐耐啲都有壓迫感，不過，風水同設計呢家咁高深嘅學問，我識條鐵咩。
我個人好鍾意食車仔麵，佢絕對係代表香港嘅麵食，比起雲吞麵更具香港特色。食麵又點少得辣椒油，辣椒油亦係決定一間粉麵店好唔好嘅指標，佢哋嘅辣油夠辣夠香。
3
呢度嘅餸式都係大路果幾款，款多少唔係問題，最緊要係樣樣好食。呢間比起'林子善'多咗經典嘅雞翼尖，夠稔離骨但未至於霉爛，可以'算'下，唔錯。豬紅好入味，正! 咖喱魷魚就不過不失啦。另一樣考店主功夫嘅係冬菇，冬菇呢家嘢真係唔慳得，唔靚嘅菇會有苦澀味又韌，落多多糖都救唔到。呢度嘅菇有水準，雖然菇未至於好堅，不過夠厚，亦好入味，唔會太甜，入口爽滑。最緊要個靈魂未講, 呢度嘅應該有溝甜醬, 甜甜地又夠辣.
菜餃皮薄餡多，調味適當，唔肥膩。
掙啲漏咗個湯未講，湯頭偏淺色，味道較'林子善'簡單，但依然夠味。似乎冇咩味精，唔口渴，唔太鹹。
佢哋價錢與同區比較差唔多，味道雖然係'林子善'贏個馬鼻，但係都不失為一碗有水準嘅車仔麵。
