來自東京嘅人氣蘋果批Mille Mele Tokyo早前登陸銅鑼灣，主打即焗蘋果批，喺日本橫濱同鐮倉有3間分店。「招牌蘋果批」($36/個；$138/4個)以手工製酥皮聞名，加入慢煮厚切富士蘋果粒作餡，配上日本直送吉士忌廉同豆乳忌廉，經兩次烤焗，食落充滿乳製品嘅幼滑口感同香氣。不過小妹覺得佢唔係最好食嘅蘋果批，皆因蘋果肉唔夠多，蘋果肉質素偶有參差，好睇運氣食唔食到香甜蘋果。而酥皮就香氣十足，可惜層次略嫌不足，批身較薄，但整體都算合格嘅。
小妹反而覺得佢嘅「千層牛油脆粒」（$38/杯）嘅層次非常足夠，粒粒都炸到酥香脆口。
「蘋果梳打」($28)，梳打水伴新鮮富士蘋果肉糖漬而成嘅蘋果醬，飲落冰涼而唔太甜，都幾出色。
