村爺爺龍蝦湯.泡飯.燉湯專家

之前睇到網上介紹村爺爺嘅海鮮龍蝦湯泡飯，覺得好吸引，所以次次去油麻地都叫波子頭帶我去食，但佢次次到話唔試要食其他嘢。今日我哋又去油麻地果欄，我又話想去，佢今次終於肯陪我去喇。😍

一去到門口，波子頭就話，村爺爺原來係呢個村，佢一直以為係四川嗰川，川爺爺食四川辣嘅嘢，所以次次都唔去。😂😂😂

睇吓個餐牌，波子頭見到個花膠響螺鷄煲翅做緊特價由$128減價$68，就決定叫呢個再加$10轉套餐。我本來係想試極上海鮮龍蝦湯泡飯，但今晚又食海鮮，所以決定叫個自選龍蝦湯泡飯$48，可自選2款餸加時菜，我揀咗鮮魷魚鮑片菜心泡飯。

嗰龍蝦湯泡飯一上枱，嗰賣相非常之唔吸引，餸又好少，得4件魷魚，4片鮑片同菜心，同我想像中差好遠。試吓嗰湯，味道同嗰賣相相反，出奇地好食。但其實呢個自選餐可以加$7有多1個餸及熱飲1杯。

$48

波子頭嗰花膠響螺鷄煲翅嗰賣相超吸引，有半隻鷄，花膠，翅。因為只係$68，所以花膠同翅嘅質素以呢個價錢都算ok。隻鷄都唔錯有幾多肉，但個湯底我就覺得龍蝦湯好食啲。

$68

差唔多食哂，見到隔離位叫咗個極上海鮮龍蝦湯飯，嗰賣相超吸引，波子頭話下次再嚟試吓。