明星海鮮酒家 (Closed)

平日好少去到油塘，去親都係為咗掃墓拜山。一般都係空肚拜山，所以拜完特別肚餓！同屋企人一齊唔想諗地方搵食嘅話，通常都係去飲茶。明星酒家分店好多，但冇一間响附近。因為佢大多藏身領X商場，所以位置冇咁方便。場內大枱好多唔駛排就可以直入，反而細/中枱就要等位，但都係等15~20分鐘左右。酒樓環境衛生，枱與枱之間唔算好迫，坐得舒舒服服！點心方面，腸粉比較出色！粉漿厚薄適中有彈性，腸粉皮唔會一夾就散。而牛肉腸粉啲餡料係用切碎嘅牛肉粒，而唔係坊間嘅牛肉漿，係真正有牛肉嘅牛肉腸粉。而炸兩腸粉又係外軟內脆熱辣辣，誠意推介。值得一提係四賓雞扎，佢哋係用最傳統餡料 - 豬肚 / 魚肚/ 雞肉/ 冬菇，係兒時食過嘅配搭比用火腿條好食入味好多。包點方面，雪山叉燒餐包絕對係皇牌！香酥嘅脆皮充滿牛油香味，包底鬆軟，叉燒香甜，一次感受多重口感！其他點心水準一般，蘿蔔糕同埋菜苗餃就唔推介喇！蘿蔔糕始終係自家出品最足料。而菜苗餃啲皮一夾就穿，菜苗淡而無味水準之下。