Imperial Restaurant

青衣村有新酒樓，理應好期待，因為附近已經無野好食。這間酒樓，由新開張第一日，差吾多都去過10次有多，如果吾係遷就老人家，真係吾想再去。
開張第一日，都知會好混亂，但估吾到係亂到咁，人多預左，正所謂新X坑，三日香，個個都想飲頭啖湯。等位已經係指定動作，但係好多人無攞飛就自己走入去搵位，裡面侍應又吾理，有人坐底，就開茶俾人，搞到出邊啲人等極都無位。枱號又亂，傳菜不停咁攞住啲點心周圍搵枱，由頭搵到尾，都未搵啱枱。由平時飲一個鐘頭茶，變左3個鐘都未有得食。
算。。。當你新開張，原諒你未熟。隔左一個月再去，情況略有改善，但服務真係好差，我親睇見過個帶位小姐鬧茶客，個茶客只係要求開茶，點知個帶位小姐竟然話等一陣開茶會死咩，等下啦。。。下刪一百字。。。。
到今日佛誕假期再去，情況又回復當初的混亂，揮手無人理，個個侍應黑口黑面，帶位小姐又發揮佢鬧人的本色，係門口叫位時，大大聲鬧啲茶客，話人吾知就吾好咁多野講，收聲等等。。。。，入到去，另一位帶位小姐帶你遊完一張枱又一張枱，都未決定俾邊張你咁，未飲茶先勞氣。
至於食物方面，由於下午茶時段，價錢尚算大眾化，兩個都係幾十蚊便可以食得飽飽，至於味道：
燒賣 - 賣相一啲都吾吸引，味道更似公仔點心，同其他酒樓差很遠
牛肉 - 有時會有陣騷味，口感吾係太好
腸粉 - 幾滑，但份量很少，一般酒樓都係三條，這裡只得四舊，不是一條條，而間中會係凍，吾係熱
鳯爪排骨飯 - 味道吾錯，飯煮得剛剛好，鳯爪排骨一般
小籠包 - 係灌湯小籠包，真係有湯於小籠包內，水準之作
鮮蝦粉果 - 口感不錯，但有時蒸得不夠，或過火，太不穩定
其他點心質素，不算突出，一般酒樓出品，但很多時點心未蒸熟就攞出嚟，要換嚟換去，浪費時間。
唯一可以贊，只可以話佢啲茶真係夠水滾茶靚。其他真係不知所謂。