王牌冰室 (南豐紗廠) (Closed)

小妹一直好想去新開張嘅南豐紗廠行吓，感受一下文青嘅氣息，行到攰攰地，就見到呢間冰室。我哋二話不說就嗌咗最馳名嘅特濃牛乳炒蛋叉燒蝦仁雙拼飯。炒蛋非常香滑，有濃厚牛奶味，仲好食過某某大排長龍嘅”公司”呀。蝦仁非常大粒，亦都好彈牙，加埋啲惹味叉燒，呢個配搭真係無得輸。另外在嗌咗個王牌西多，唔好睇佢好似好邪惡，食落其實一啲都唔漏，非常滋味，咬落去入邊啲留心芝士慢慢滲出來，實在叫人欲罷不能。因為小妹對雪菜情有獨鍾，於是特意點左一碗雪菜牛肉米線。開頭我以為十分普通，同啲連鎖快餐店冇分別。點知食落雪菜有種說不出嘅清爽香氣，牛肉鮮甜爽滑，整碗米線叫人非常驚喜。最後食得太滋味，發覺仍然唔係好夠飽，見到餐牌上有瑞士雞翼放題，於是我哋兩個點左四隻瑞士雞翼，又好味又抵食。最後當然唔少得嘢飲啦，男朋友叫咗杯香滑奶茶，襯返個瑞士雞翼同埋西多。我就叫咗一杯冰鎮相有觀音王，茶味濃郁有味新鮮，啱晒炎炎夏日。各位文青們如果去開南豐紗廠行街，呢間冰室絕對不能錯過。