呢間餐廳離地鐵站B1/2出口五分鐘路程，車仔麵嚟講個環境係異常闊落同舒適😹 通常出面都係一張圓枱同圓櫈，點會好似呢到有卡位出，啲櫈仲要有得挨🤤
除咗車仔麵之外，呢到仲玩埋燉湯，好啱灣仔地區嘅打工仔，有時做嘢辛苦ot無得番屋企飲啖湯水，有個燉湯飲下就可以補番好
呢到餸同麵嘅款式都比一般嘅多，淨係麵都有成十三款咁多🙀 餸就有齊哂食車仔麵不可缺少嘅款，不過要小心佢可能會賣哂。特別一提就係蔬菜嘅款式都有成十種🙀 其實肯提供咁多款式真係好難得，因為餐廳要預備嘅食物又會多咗、難預咗
蟲草花花膠百合燉雞腳
飲咗第一啖心諗鮮甜到傻咗！！
真係好足料，用匙一「不」就勁多餸，飲咗我地每人兩碗湯🤤
花膠有成三、四舊，仲要舊舊都勁大塊
我碗車仔麵叫咗菠菜麵、麻辣小辣湯底，餸有皇牌豬腩仔、麻辣豬大腸、生菜
豬腩仔同高質嘅豬軟骨有啲似，啲肉煮到勁入味，咬落好腍好易咬開，加上塊肥膏，即刻覺得應該要送飯😋
菠菜麵麵質頗結實
麻辣湯底好正，同食麻辣火鍋嘅湯底好似，唔會一味死辣或者死麻。個小辣對無食開辣嘅人嚟講都係重負擔嚟😹
麻辣豬大腸好掂👍🏿 首先真係入哂味，啲豬腸入面啲肥仲係齊到，咬落有脂香，唔會好韌或者無咬口，絕對係高質
朋友個碗係讚歧烏冬配四爺秘制莞茜皮蛋湯，餸有手工白菜餃、陳皮魚蛋、菜心
個湯底正到不得了，本來朋友想加啲辣醬，但個湯太真材實料，佢話都係唔好污染個湯😹 最尾仲飲哂成碗
呢間車仔麵高質👍🏿 除咗車仔麵仲有得嗌飯食，咩口味都照顧到，啲座位又有別於傳統車仔麵舖，真係帶friend食又得、情侶食又得👍🏿
