龍門棧 (Closed)

周末最好就係飲茶，今日男胖子帶左我黎呢度飲茶。餐牌內有多種茶可以選擇，揀左最常飲嘅普洱。茶味醇厚回甘，色澤呈烏，有助暖脾胃及消化。點心籠好特別，起角的。鮮淮山花膠蘆筍雞札，好名貴嘅雞札，入口新鮮，除左基本雞肉之外，仲有好有益嘅鮮淮山，配搭好新穎！日本鰻魚香煎粢飯，鰻魚上有閃閃金泊，貴氣逼人，肉質爽口，下底有煎過嘅粢飯，口感似鍋巴，好食！蘿蔔千絲酥，好鬆化，入面蘿蔔絲好多汁，大愛！柱候金錢肚，非常惹味！色澤都好靚，有芋頭粒伴底。長腳蟹小籠包，湯汁一咬就入口，蟹肉好鮮味，皮亦好薄，值得一試！香茜炭燒蜜汁叉燒腸，腸已切好一舊舊，免卻要分腸嘅煩惱，每舊腸有一粒杞子點精，粉皮好幼滑，叉燒不會過硬，好味道！