允升甜品

去長洲玩，點會少得不停咁食食食。講起長洲，一定係諗起長洲大魚旦同芒果糯米糍。今次就介紹下長洲嘅芒果糯米糍。我每次去長洲，都會係去允升甜品嗰度。允升甜品唔止芒果糯米糍做得好，而且其他甜品都好好味，所以每次都會幫襯。熱辣辣嘅天氣最岩食啲凍嘅嘢，而我好鍾意芒果，所以我每次都會叫啲同芒果有關嘅嘢。

2

芒果水晶(左上) $23，芒果凍奶(左下) $22:
一睇就見到啲芒果隻色好深，姐係代表佢係好熟，好甜不在話，不過水晶同奶凍都好普通，都係為咗食個芒果甜品，如果要比較，芒果水晶似乎吸引啲，水晶咬落去又爽又冧，比奶凍特別。

芒果糯米糍

$10

芒果糯米糍:雖然啲皮好多粉，食果時會跌晒啲粉，又會整到周圍都係，但係個皮好煙靭，厚薄啱啱好，但係又唔會黐牙，包住個大大舊嘅芒果，一咬落去好juicy，啲汁都會咇出來，芒果亦都好甜。仲可以外賣返去，一盒可以4/6/8/12咁買，我每次都係買6個返去，通常6個入面有1-2舊係比較酸，但其他嘅都好甜。

芒果糯米糍 （黑糯米皮)

$10

芒果糯米糍(黑糯米皮): 而黑糯米皮嘅芒果糯米糍亦都唔錯，食落去比嘅口感同普通嘅差唔多，煙靭程度多少少，黑糯米有小小出，但一啖咬落去芒果味係會較重，呢款亦都不失為好嘗試。

下次去長洲又會食呢間，係點都唔會變嘅。