小欖燒烤樂園 (Closed)

今日一家人去小欖燒烤樂園燒嘢食，對上一次去已經係幾年前。今次再去覺得好玩左好多。嘢食又多咗。基本嘅丸類、腸類，應有盡有，貢丸牛丸魚蛋燒賣，廚師腸紅腸，全部有齊，最欣賞係佢有豆卜，燒豆卜，加蜜糖真係好好食。而且肉類好多選擇，雞翼豬扒牛柳粒雞腎樣樣齊，個咖喱魷魚非常入味，其他醃肉口味繁多。咖喱、孜然、蒜蓉、燒汁，咩味都有。最令人估唔到，係連蔬菜都有不同種類。除咗基本嘅粟米、翠玉瓜、茄子，仲有好鮮甜嘅番茄仔，三色椒，同娃娃菜。啲蔬菜一啲都唔老，燒烤場來講，都算鮮嫩。除咗食物豐富，玩樂設施都好完備。有釣魚、玩魔術沙、穿珠仔、畫面具等等。當然最受歡迎嘅一定係彈彈床。總括一句：大人細路食得飽，而且玩得非常開心！下次一定約埋D朋友一齊黎。