。咁岩尋晚阿媽同阿妹一個話聽晚唔煮飯
,一個就想收工係銅鑼灣買野,就諗住係銅鑼灣食。尋晚結果深夜係呢個網搵食,想搵D唔係連鎖店既日本料理,要付合"未去過","銅鑼灣","一定要有鰻魚既飯",呢3個條件為先,睇左成晚覺得呢間符合晒要求。上到去6點40分,我地尚算早,所以入面唔係好多客人,我地一家4個人就安排坐門口對入第2張卡位。入面地方都算大,而且有兩間係有間隔既小廳,樓底高而且通道同坐位都夠闊。4人比兩SET餐牌睇可以慢慢一齊睇。
睇左餐牌之後,4個人既想食壽司,又想食熟食同飯
所以叫左"精選壽司,牛肉烏冬定食","銀鱈魚西京燒定食"同埋"鰻魚釜飯定食"。另外叫左荵吞拿魚文碎卷,鹽燒油甘魚鮫,燒牛舌,燒雞翼,燒合鴨大荵雞肉,炸軟殼蟹同埋一杯青檸梳打。
1
由於我地早黎,上餐時間都快,唔使等太耐,最先到既係精選壽司,牛肉烏冬同文碎卷,燒物,串燒同炸軟殼蟹都算快,釜飯既制作係店門口設置,可以睇到製作過程。壽司臺有5個人同時準備。
今次冇影太多食物既相,但有特別影樣野
燒油甘魚鮫$98一份,一件有手掌咁大同長
,冇影既軟殼蟹$58比平時係某黃色招牌既連鎖店既份量起碼多2倍以上,大過我呢D巨人手掌
。呢兩樣食物我覺得性價比夠晒高,特別係軟殼蟹,係出面一定好難搵到咁大碟同份量夠
軟殼蟹夠大件炸漿唔厚,一份4個人食都夠分。而且炸物同燒物都唔見好多燒過多火變黑晒既位。魚鮫勁多肉,由於定食有飯,配飯一流。牛舌夠淋唔韌而且食完冇渣,我地前後分兩次叫,第一份既肉較瘦,而第二份就有少少肥肉,但係燒出黎既賣相冇分別,證明師傅係多左單做既時候食物同手勢都不失水準。成晚食物唯一失左水準既係牛肉烏冬D烏冬,有少許偏淋左。
壽司方面,每件都夠新鮮,我食左赤身,三文魚腩,拖羅,油甘魚,金目鯛,牡丹蝦,上面既料全部都夠凍而下面既飯夾既時候唔散同有微暖。味道以赤身為最深印象,入口後味道會留好長久
,牡丹蝦夠大件,油甘魚油味夠香濃,金目鯛夠清香,所以大家食高級壽司時,食既次序真係最好由淡至濃
。而每份熟食定食既剌身有甜蝦,帶子同三文魚各一件,甜蝦同帶子好鮮甜而且冇雪味,三文魚就夠油份同冇根。釜飯就係日式既煲仔飯,上菜既時候,侍應會比個一分鐘既沙漏同埋飯潷,飯匙,當沙漏漏完就可以開左個釜蓋
。鰻魚味道夠晒香同岩味,我媽今晚食到比平時佢食既份量多,而且鮮味到我地更唔使加醬汁落鰻魚度,而釜飯底既飯焦易拎出黎。定食配既沙律係柚子醋沙律,清甜爽口,而且有份黃色既醃蘿蔔,可以開胃。味噌湯細細碗,咸淡適中。銀鱈魚燒至金黃,肉質唔韌,用筷子好易就可能跟紋夾出而不散肉。
定食既甜點可以4選1,我地選左2杯凍咖啡同一杯雪糕,凍咖啡只配奶,冇糖水配。我飲開奶茶而冇飲開咖啡,而且係即過濾呢種,所以感覺覺得會唔夠甜,但我都感受到種咖啡香味,而雪糕就係Ha-Daz既曲奇味,夠晒凍
。侍應補茶同執拾既密度都足夠。整晚唯一較甩拖既係要再問多次至黎好耐未到既雪糕。但整體黎講,我一定會再黎呢度食。
今晚自己有樣特別既就係,我自己今晚除左食之前飲左啖茶之後,除左飲味噌湯,我到食完所有食物等餐飲前至需要再飲茶,如果食物有味精同好油膩,我一定會係咁飲茶同水,呢個係我最後至發現。
