阿太車仔麵 (Closed)

啱啱過開來創紀之城做嘢，突然間想食車仔麵，於是過咗對面條食街。見到一間叫阿太車仔麵，見佢出面裝修幾特別，於是入去試吓。入到去鋪頭裝修有啲日本風格， 侍應姐姐都好有禮貌，問我食乜嘢。因為我一心想食車仔麵，於是就叫咗個四餸車仔麵，有蘿蔔，豆卜，腩肉同韭菜餃。蘿蔔非常清甜，腩肉都幾有咬口同埋入味，韭菜餃都好爽同夠香，可能因為我鍾意食韭菜，反而豆卜就冇乜特別。我比較鍾意係佢個湯底同辣醬。聽姐姐講湯底係每日用豬骨煲6個鐘，另外辣醬就係師傅親自炒，所以我見到入邊會有蝦米同埋豆豉，而辣味都好重。呢間車仔麵整體感覺不錯，下次過嚟做嘢可以再試。