2DP (Closed)

食得肉多都會想食D齋去平衡一下，但係又怕悶，最怕嗰啲傳統豉油齋，西餐素材就比較多樣化，而2DP就係我時不時都會想去食嘅選擇。一段時間冇去發現佢個餐牌又唔同晒。依家好多漢堡包譜都有用impossible 做漢堡包今次依個黑松露醬羽衣甘藍燒烤菇impossible 漢堡，內容同個名一樣咁豐富，係一啖咬唔晒嘅，女仔食要小心啲因為佢超多汁。用芝士包住嘅impossible meat 同一般漢堡扒冇分別，加埋多汁烤菇同粗纖維羽衣甘藍，又飽肚又好味。成日都見到有蒟蒻麵賣，但係成日都覺得唔知點樣煮佢先會好食，怕好似打邊爐D蒟蒻咁煮一輪都冇味道，專業嘅果然唔同，佢令到蒟蒻麵掛上酸酸甜甜嘅蕃茄汁，而超吸汁嘅猴頭菇，簡直食唔停口。其實依個忌廉牛肝菌impossible 肉碎闊條麵,個忌廉汁比起蒟蒻麵個番茄汁更加濃香，但係可能我比較鍾意蒟蒻麵個質感，所以我會比蒟蒻麵高分D。兩款薄餅都好吸引，心大心細一輪之後，都係覺得銀菜比較特別一上枱發現佢非常之大，好彩係超薄嘅薄餅，再加埋番茄醬蔬菜，食起嚟都冇負擔。今晚大家都食得好飽就唔好食甜品啦，見到隔離枱嘅甜品好吸引下次要再過嚟食。