下午茶餐叫咗乾炒牛河跟熱奶茶少奶。奶茶啱飲，味濃有回香，淡奶量唔會太少太多，剛剛好，用經典厚身奶茶杯，感覺好過用黑白奶杯。
河粉份量大過預期，當正餐食都夠飽。牛肉件數多，咁多件入面只食到一塊係橡筋咁韌，講唔上肉味濃香，正正常常咁啦；河粉上色唔均勻係事實，不過入口有鑊氣，夾起唔係一舊舊或者自動解體，調味適中，食到底冇剩返一氹油喺度。灑咗少少芝麻喺面頭，賣相靚啲，可以多啲芝麻就好喇，因為喜歡食。要求店員提供的辣醬，夠辣但偏鹹，倒少少好喇。
舖頭大，坐得舒服，部份位置冷氣大咗啲。留意返，店方冇提供清水一杯，茶餐不設加一。
