光榮冰室 (福昌大廈) (Closed)

上個星期去光榮吃過兩次下午茶第一次試佢嘅蔥油鴛鴦扒飯（少飯） 凍檸檬茶走甜第二次係吉列豬扒西多士 凍鴛鴦走甜蔥油鴛鴦扒飯，有一件雞扒， 一件豬扒，兩塊扒都好大塊。蔥油同甜豉油好香好好送飯。檸檬茶茶味足夠，檸檬比較薄同埋少。見店員姐姐好好服務，對面位客人要求加冰，佢拎杯冰埋去，叫佢飲減幾啖先，小心翼翼幫佢加，唔係放低就算。隔離枱話要多飯，佢又係即刻叫廚房𢳂一碗飯出嚟，全程都笑笑口，仲問埋另外一個使唔使要多啲飯，要就出聲，直頭有媽媽嘅感覺。第二次就食呢個吉列豬扒西多士，我見到四周圍食炸嘢嘅人都係炸到好過火，所以已經叫咗唔好咁燶，都聽到樓面姐姐同廚房講炸得輕手啲。出嚟都係比較熱氣嘅感覺，佢塊豬扒都幾大塊，西多士入邊都有足夠嘅花生醬，就係炸嘢嘅技術唔係幾好，西多士咬落口都幾油。食西多士果支糖漿好乾淨食西多士嘅牛又係植物牛油（馬芝連）凍鴛鴦就冇凍檸檬茶咁好飲，唔係幾香濃。要讚嘅依然係樓面姐姐嘅服務態度下午茶餐嗰塊豬扒一定係吉烈，如果想食煎豬扒就一定要食飯，同埋明明吉列豬扒同埋炸雞髀，散叫係一樣價錢，偏偏雞髀就唔可以配西多廚房偏好煎同炸嘢都好過火，食完兩次都好熱氣。