要出尖沙咀，所以睇下有咩好食，見咁多好評就黎試試。荃灣分店食過唔錯，尖沙咀就第一次食。
1
都算好多選擇，刺身、壽司、鐵板燒、串燒、一品料理、天婦羅、沙律。
刺身
張紙係有好多選擇：特別d既有馬刀貝、黃金貝、燒鰹魚。但只係得張紙有，叫幾次都無黎過，黎親都得得三文魚、甜蝦、北寄貝、魷魚。三文魚厚切都算ok。
芝士焗蠔
芝士好膩，隻蠔好細隻，同蠔豉差唔多size。
燉蛋
好少放題有燉蛋，所以叫黎試試。好迷你，無咩料，得魚蛋。唔夠滑但算入味。
火炙三文魚壽司
燒得過熟，無入口即融既感覺，同埋上枱既時候已經唔熱。
芥辣蟹子壽司
除左變左綠色之外，同普通蟹子係一模一樣。不過紫菜好脆，係新鮮整。
芥辣八爪魚
呢個出奇地好食，生八爪魚配上wasabi幾夾，好爽口，仲有青瓜可以解辣。值得encore！
煙肉青口
我覺得佢個汁好味過焗蠔，無咁膩同有煙肉，香口啲。
一口牛
牛肉算淋，但無牛味，不過不失。
鐵板帶子
雖然帶子細粒左啲，但係都好好味。
牛舌串
呢個好味，夠厚，唔會太淋夠爽口，襯黑椒粒夠惹味。encore左幾次
