一黎到當然要先叫刺身，佢比嘅份量都幾足，特別推介磯燒鮑魚，非常入味，一啲都唔韌，仲要都唔細隻。花海蜇刺身非常大塊，好爽脆。另外，仲有松葉蟹腳任食，雖然唔可以話係酒店自助餐級數，但係以依個價錢黎講，真係值回票價。
壽司手卷方面，特別要推介海膽手卷，佢迷你嘅size好啱放題，一啖過唔會令到你太飽，又可以食多幾件，海膽一啲都唔腥，有驚喜！
朋友表示好難得放題入面，佢最鍾意嘅係熟食，鹽燒牛舌非常好食，有咬口得來一啲都唔韌，有少少肉汁，佢一個人食咗六串！證明真係好好食。
我就鍾意食鐵板鵝肝，鵝肝配搭住脆片，可以解到鵝肝嘅油膩，雖然係任食，鵝肝都算厚，食落去入口即溶而非常香，我都食咗唔少。另外要推介蒲燒鰻魚、芝士黃金醬燒海邊蝦、川味精珍寶鮮蠔，熟食黎講都算出色！
當然唔少得任食榴槤，薄皮，入面軟滑，非常濃味，呢個價錢可以任食榴槤真係物超所值！
值得一提嘅係佢哋上菜速度算快，而且服務態度幾好，刺身同熟食都唔錯嘅放題，埋單都只係每人$295，值得再黎！
📍極尚大瀛喜日本料理 (旺角)
旺角彌敦道655號5樓
