和藏 (Closed)

放工去咗同朋友試上環新居酒屋。飲住sake，氣氛幾好～我鍾意呢度嘅柚子蘿蔔，好好食！！食完一粒又一粒，清新爽口😋門口有個海鮮櫃，有晒當晚嘅時令海鮮，呢晚想食刺身，就揀咗深海池魚，揀完之後師傅就會埋頭起肉拆骨，轉眼就擺到靚靚喺面前。加埋order咗炙燒吞拿芝麻漬，唔同做法嘅魚都食咗🤣驚訝於Menu超多唔同種類嘅嘢食，餐廳睇落細細間，竟然有齊串燒、刺身、炸物、鍋物......燒牛舌芯、蒲燒新鮮鰻魚兩款呢晚好味嘅串燒。鰻魚厚肉蒲燒汁味濃，欣賞作燒到皮香脆。而燒牛舌芯口感好嫩。 朋友就鍾意廚師長秘製吞拿魚下顎，因為其他地方比較少食到。後來追加嘅三元黑豚腩串同燒阿波尾雞翼都係熱辣辣上枱，調味正常，呢個時候，我已經掛住食充滿牛油味嘅燒蕃薯了。五卵卡邦尼烏冬五卵係指明太子、海膽、烏魚子、三文魚籽同溫泉蛋，個配搭幾得意。因為而家好多新派居酒屋都有卡邦尼烏冬，本身無咩期望，點知食落有驚喜，醬汁調味恰當，香濃得嚟唔膩，作為主食啱啱好，如果烏冬質地彈牙啲就好喇。最後有柚子雪芭做甜品，開心。