榮華南洋冰室

Open Now

Now Closed

雖然上環好多cafe，但係偶然都想試下唔同嘅嘢，所以今日就去咗榮華南洋冰室，餐廳裝修都幾有特色，所以都幾容易搵到。因為實在太熱嘅關係，一嚟我哋就嗌左兩杯嘢飲，分別係菊花露同埋柑桔蜜，貪佢哋比普通嘢飲健康。菊花露飲落去甜甜哋，飲落覺得消暑。柑桔蜜就相對冇咁甜，而且飲落去仲好濃嘅柑桔味，直頭好似用平時屋企人自製嘅柑桔沖。我叫咗個冬陰功牛柳粒金邊粉，冬陰功金邊粉味道濃郁，見到店主有心思咁落咗好多香料，煮起嚟更加入味，酸度同辣度都平衡得啱啱好。牛柳粒係分開上嘅，炒得非常之有火喉，而且有啲紅椒絲、青椒絲、蘿蔔片同豆卜做配菜。朋友叫咗個冬陰功湯海鮮金邊粉，誠意十足，有好多唔同嘅海鮮，包括青口、魷魚圈等等，同樣地用咗好多香料去煮，唔單止金邊粉，就連海鮮都入晒味。