麵家山下 (Moved) New Location

我對呢間拉麵店嘅認識，源於日裔老闆娘大戰水貨客嘅新聞。確實呢度係上水區嘅一片清泉，餐廳外未夠一米就已經有幾堆水貨客係到將啲貨入箱，四周圍都係行李箱，一眼望曬都係藥房，唔係專燈搵根本唔會察覺到呢間喺藥房堆入面嘅小店。麵家山下嘅舖面唔大，總共有兩層，樓下係落單嘅地方同廚房重地，落完單就係樓下等侍應拎碗麵上嚟。今次叫咗碗「叉燒拉麵」配辛湯底，拉麵係幼身，硬度普通。配菜都係基本嘢包括荀，蔥，蛋，紫菜。根據餐廳所講，呢度嘅湯底用上海外嘅豬骨熬足十個鐘而成，絕無味精，果然湯底好清甜，唔鹹，豬骨味好濃郁但唔肥膩，不過我自己個人鐘意油膩啲嘅豬骨湯底。湯底嘅辛味好強烈，係我意想唔到嘅高調，有種香港人鐘意嘅潮州或桂林辣椒醬嘅味道，估計係為咗遷就香港人口味而設，不過味道係吸外，鐘意食辣嘅朋友會鐘意。呢碗麵嘅精華係塊叉燒！叉燒薄身呈上，非常柔軟腍滑，脂肪同瘦肉嘅比例平均，一咬肥肉就差不多入口即溶，而瘦肉部分並無起渣，而且非常入味！暫時係我食過最入味嘅拉麵叉燒！