上到4樓，得兩枱客，員工全部企埋一邊傾偈，完全無人理你！一架點心車仔都無！
想落3樓搵點心車，得番3架，有兩架嘅嘢係一樣嘅：都係鯪魚肉、鳳爪排骨、蓮蓉包、叉燒包，另一架係蝦蛟同唔記得咩唔好食嘅嘢，見無咩嘢揀，求其攞左蝦蛟同叉燒包回4樓。
點心咭上釘左張點心紙，話“即叫即蒸，照劃單價錢(即係又貴啲！)，供應至下午3:30,剔左兩樣點心，揮手，兩個侍應見到唔諗住過黎，只叫身旁的男部長過來！一個推一個，男部長不情願地過來，望左張紙一眼就話不如等3樓啲點心車上黎啦。我話我去過下面無呢啲點心所以先剔啫。佢話係呀，晏啲啲車仔開始收架啦。我話咁咪落單囉，你寫住供應至3:30架嘛(當時未夠3:15)！佢竟然話我做4樓唔知3樓有無得落點心架咼，不如你等下啦。你剔另外嗰樣通常好耐先整到架咼(水晶包)，我唔知你等唔等到咼！咁你仲落唔落呀？
怒火升到頂點，同佢講你咩都話無咁咩都唔駛落啦！佢滿意咁話：咁同你擦左張紙啦！ 就行番去傾佢嘅偈！
一肚氣咁食蝦蛟同叉燒包，全部都係唔熱，蝦蛟又細粒又乾。叉燒包餡少但味道尚算可以。到3:30，部長再行黎話有車仔上黎啦，你揀啦！只見都係嗰3架車仔，叫賣着一樣嘅嘢！
環境：枱布全部都係灰灰的，一路食嘢一路有員工攞住巨型吸塵機企喺你側邊一路吸地毯一路傾偈！呢種趕客嘅方法真係一流
真係好難搵到一間上上下下都唔願做嘢同齊心趕客嘅酒樓！咁嘅服務態度、食物同環境真係絕配！！
