近來比較早食晚餐，五點幾六點黎到已經有幾枱客開始食緊，坐低後更發現好快滿座。餐廳環境光猛乾淨，有方枱圓枱，除咗會預備熱水俾你清潔餐具，見到餐廳都係餐具消毒柜。
除咗可以㨂淨火鍋，仲可以選擇⋯⋯
「澳門雞煲」
「鯇魚煲」
「粥底海鮮鍋」
「藥膳雞煲」
「藥膳川芎白芷魚頭鍋」
「秘制羊腩煲」
「椰子雞煲」
食完個鍋再繼續加湯變火鍋，仲可以任飲，完全滿足哂幾個願望^^
原本我地想食粥底海鮮鍋，但原來要預訂，唔怪得聽到老闆娘好忙咁聽訂座電話（下次要醒目），今次先黎試下個雞煲～等緊個雞煲之際，梗係去拎咗調味醬先啦，醬油、葱、蒜蓉、沙薑、辣椒、芫茜、沙茶醬等，我都幾意外有沙薑，曾經有一次試過火鍋配沙薑醬油，出奇地好味，大家可以試下。攞調味料之餘，可以順便攞埋隔離既響鈴呀～
雞煲等咗一陣就到，一打開～鍾意芫茜既我見到堆芫茜山表示心心眼！哈哈！雞煲已經煮好，撈一撈就食得。雞肉都煮到好入味，都算幾滑，我地叫咗小辣啱啱好，一路煮一路會越辣，煲內既配料都好多，食雞煲最鍾意食埋紅蔥頭同蒜頭勁正。
食到咁上下，就可以加湯變火鍋，餐廳門口就有個凍櫃放火鍋料，除咗有一般既牛肉、丸類、午餐肉、腸仔，公仔麵、烏冬，菜等，仲有䈑筍、牛柏葉、牛肚、牛腸、豬皮，最驚喜係仲有魚頭，蜆同蠔，個蜆我地仲攞咗兩轉～
飲品方面，最爽既可樂必定有啦，仲有啲其他選擇，薑母茶都唔錯架！我覺得最抵當然係啤酒，仲要有好多選擇，唔錯唔錯。
每人$1xx，又食煲又火鍋又任飲，味道仲要唔錯，呢個價錢真係邊度搵，性價比高啦！埋單走人時餐廳都滿座喇，可想言之幾咁搶手，天氣開始涼涼地，我諗好快會有下次，一定要早啲打黎留定位～
