緻 (Closed)

星期日同男朋友黎到將軍澳海傍附近既緻食晚餐，食完仲可以係海傍散下步，吹下海風。我地揀左十分豐富既$558二人前餐，食到好飽。前菜盛盒有羊棲菜、青瓜漬、泡菜。羊棲菜即係海苔，我最鍾意呢個，好味。胡麻番茄沙律好新鮮，切成一片片，容易入口。時令刺身: 油甘魚、三文魚、吞拿魚，全部都唔係薄切，無雪藏味。鰻魚香蔥玉子燒幾特別，玉子入面都包左啲蔥，鰻魚幾香口，一齊食都幾夾。小貝柱麵豉湯唔會鹹，仲有啲小貝柱、蒸蛋粒、海帶條。到左串燒盛宴。精選雞肉串燒係雞頸，我覺得好食，肉質軟腍又啖啖肉，有少少孜然粉，好惹味。日本白豚五花腩配柚子胡椒醬幾厚身，好肥美。汁燒帆立貝有三大粒，配上好有日本味道既醬汁。加拿大天然豬肋條都唔錯，夠腍身。牛油燒日本翠玉瓜同燒日本大蔥，個餐包含左蔬菜，健康啲。燒澳洲M7和牛小牛柳配日本淡路島藻鹽望落好靚仔，食落有牛味，口感軟腍，正。櫻花蝦蟹籽牛油果炒飯好大碟，而且好足料，好飽肚。是日精選甜品拼盤有紅豆大福、紅豆芝士蛋糕、開心果雪糕、抹茶迷你班㦸，見到都開心，我最鍾意頭兩者，好滿足。二人前仲包埋飲品，我地叫左凍柚子蜜同可樂。