冒喜 (宏利廣場)

Open Now

Now Closed

冒喜真係my Favorite，平時去開北角和富嗰間分店，估唔到牛頭角都開咗間分店，呢日同朋友去開觀塘，順便去朝聖下。 呢間分店好chill好舒服，喺高級商業大廈地舖。鍾意食牛嘅我照舊叫「牛魔王套餐」，送秘製沾醬料，好惹味。 配料有肥牛，滑牛肉，潮汕手搥牛肉丸，黑毛肚，牛黃喉，真係大滿足。 配重慶麻辣湯底，小辣對我嚟講啱啱好，唔係得個辣字係有層次嘅湯底。牛黃喉真係摯愛，口感爽脆。 滑牛肉新鮮。肥牛牛花均勻肥美。黑毛肚爽口有嚼勁。朋友就叫咗「八送八寶套餐」，有八樣餸可以揀，其中墨魚丸彈牙鮮美，蟹籽蟹粉丸爆漿口感令人上癮；內臟愛好者必試豬大腸，口感爽嫩。 湯底方面，朋友試咗 青二荊條湯，我試咗一口，辣味背後隱隱有陣神秘刺激嘅香味，富有層次。另外叫咗 秘製藤椒魚皮，脆辣過癮。 仲有 貴州丁家脆哨，非物質文化遺產食物，鬆軟香脆，佐餐一流。最後以 自家製桂花蜜烏梅冰粉 作結，止渴解辣，食完辣之後食佢身心爽利。